Gester Abig hend d Meitli e emotionali Beowulf-Sigurd Rundi und d Buebe e lustigi Kim Rundi gha (de Ace het bim Poker gunne). D Buebe sind ide Nacht so luut gsi, dass sie hend müsse 40 Minute go jogge und 50 Minute ad Wand starre. 

Am Morge sind mer am 8i gweckt worde und denn hemmer öppe e Stund Morgesport gmacht. Denn hets zum Zmorge es Monsteresse geh… aber es isch Znacht gsi will mer hüt vercheerti Welt gha hend. Denn hemmer es Atelier gha wo mer het chöne Schoggibrötli mache, e Schoggiburg baue und Spiili spille. Zum Zmittag hets denn mega feini Pizza geh (Pizza mit Ananas isch fein!). Nach enere lange Mittagspause hemmer “Kerberosset” (das isch die griechischi Version vom Werwölfle). Spöter hets denn es Lagergricht geh wo mer eus gegesiitig aagklagt hend… es isch denn bide Roulade- bzw. Brotdebatte zwüsched em Fandorin und em Aramis e bizeli uusgartet. (De Fandorin het gueti Arbeit gleistet. Bravo!)

Nach chli Freiziit hets denn Znacht (also eigentlich Zmorge) geh…

Zazou, Nameiki, Taipa, Shirocco, Leia & Abu