Mittwuch 28.7

Am Morge simmer gweckt worde und eus isch gseit worde, dass mir euses Gschirr mitneh und abe zum Lagerplatz gah sölled.
Mir hend alli regefesti Chleider azoge und sind abegloffe. Dunne hemmer zwei Parteie vo LeiterInne vorgfunde wo beidi am Floss baue gsi sind. Die zwei letschte übrige Gruppe, wo sich bim Floss baue hend müese bewiise sind d Gringos und d drunken sailors gsi. Dass sie es Floss baue hend müese hends de Hiwiis entnoh. D Hiwiis hemmer bim GS erkämpft. Während eusi LeiterInne witer baut hend, hend mir Zmorge gesse. Es het gregnet und gstürmt. Drumm hemmer denn under emne Baum Underschlupf gsuecht. De Vivo het denn es grosses Für gmacht. Lut em Vivo chönd alli Kimler grossi Für mache. Eusi LeiterInne sind denn bald mal fertig gsi mit Floss baue, also sind alli richtig Steg gloffe. Det hend pro Gruppe (drunken sailors/ Gringos) 5 Butze sich müese im Iisschollelegge bewise. D LeiterInne hend mit ihrem Floss chöne losfahre, sobald d Gruppe vo Butze bi de Ziillinie acho isch. D drunken sailors sind schneller gsi. Drumm hend sie au zerscht losfahre chönne und sind somit au früener acho. D drunken sailors hebd en Pokal gwunne, um de e Schlumpfberiwurzle gwicklet gsi isch. Jetzt hend d Schlümpf e nachhaltigi Schlumpfberiquelle.
Denn sind alli ufegloffe wills so fest gregnet het. Dobe hemmer Zmittag gesse.

Zum Zmittag het d Chuchi für eus Älplermacarone gchocht. Nach em Zmittag simmer wieder abe gloffe zum Lagerplatz. Denn isch plötzlich de Einstein uftaucht und het gseit, dass eusi Fähigkeite nöd langed zum d Charte wo eus nach Schlumpfhuse bracht het entschlüssle. Drumm hemmer chli Pfadikubd gha. Es het en Postelauf geh mit vier Pöste. D Pöste sind Seilkund, Pionier, Übermittle und Naturkund gsi. Denn hemmer en Menschechnote gmacht zum euse Teamgeist stärche. Wommer mit dem fertig gsi sind isch de Einstein abghaue. Er het eus jedoch die entschlüssleti Charte hinterla. Denn simmer go Schatz sueche. Mir hend s Orakel vo de Richheit und Weisheit gfunde. Es het eus gseit, wie mer de Gargamel lieb mache chan. Mer mues ihm eifach Schlumpfberi verabreiche. Nachdem eus s Orakle das verzellt het, hemmer e Neui Strophe vom Lagersong glernt. Denn hemmer Ämtli gmacht oder Freizit gha. Eusi tolli Chuchi het Schoggibanane gmacht, wommer denn gesse hend. Nachher simmer ufegange zum Stall. Denn hets es Lagergricht geh. De Globi isch de Richter gsi (bitzli korrupt isch er aber ja…). Er isch eimal fast gstürzt gworde. Irgendwenn het öpper de Gargamel inegholt und mir hend ihn gheilt. Nach 4 Grichtsverhandlige simmer alli go penne.
Am nechste Morge simmer gweckt worde und sind wieder zum Lagerplatz abegloffe. Det hets Birchermüssli zum Zmorge geh.