Mir händ Zmorge gässe und eus alli de Naselänge na aufgestellt. Leider händ mir kei Ässe meh, aber zum Glück het de Azrael eus siin Vorrat anvertraut. De händ mir ois müese erspiele. Mir händ eus i 6 Gruppe verteilet und gegeinander Spiele gespielt. D’Wölfli händ es Chartespiel gmacht und d’Pfadis en Bändelikampf. Mit de Bändel und de Schlumpfbeeri hämmer eus entweder chönne Sache chaufe, zum en Vorratsbunker zbaue, oder mer hett sich chönne Schritt uf de Charte erchaufe. Wenn d’Leiter pfiffe händ, hetts Specials geh. Wenn d’Leiter zum Biispil drümal pfiffe händ, händ drü Chinde müesse gah. Bi de Specials hett me chönne Zuetate für e Schoggiburg günne, wo nachher euse Zvieri gsi isch. Nachdem alli Zvieri gässe händ, hett de Azrael eus e Charte gah, wo es rots Chrüzli druf markiert gsi isch. Dete simmer go luege und mer händ es „Wunder Exilier“ gfunde. Zum Znacht hämmer Ma-Me gha. Nachdem Znacht hämmer es Drübeifuessball und nachher no es Hotelfangis gspillt. Bim Hotelfangis isch d’Caillou gstolperet und hett sich verletzt (nicht in echt). Mir händ ihre denn das „Wunder Exilier“ geh. Denn simmer alli go Zähputze und is Bett. Am nächste Morge simmer ufgstande, händ echli Morgesport gmacht und händ zmorge gässe. De Caillou hett jez übrigens echli schlächti Lune.