Tagebuch

Als Belohnig defür das mir d Schlumpfberrii vo de schlümpf wieder gfunde hend, hend d Schlümpf mit eus Wellness gmacht. Es het Massage, Bändeli chnüpfe, Mandala, Hörspiel, Handpeeling und Spieli geh. Zum eus uspowere het d Pfadistufe Staffette und Fläschespiel gmacht und d Wolfsstufe Staffette und Ziitigläse gmacht. Zum Znacht hets Chilli con und sin carne geh. Nach em Znacht sind d Butze is Bett und d Leiter sind in Pub vo de Matrose iglade worde. Det hets sechs Gruppe geh und d Gwünnergruppe vom Nagle und Kämpfe isch ufglöst worde. Das isch de Afang vom 24h Game gsi.
Tagebuch 27.07.2021
Am Ziistig morge simmer alli vo betrunkene Pirate gweckt und us em Bett zerrt worde. Mir sind ih 5 verschiideni Gruppe ufteilt worde d Sirüpler, Brokkos, Gringos, die understi Schublade und d Drunk n‘ Saler. Nach em Zmorge hand sich d Sirüpler als erstes uf de wiiti Weg gmacht. Uf em Weg hets 4 Poste geh, wo alli hend gmacht. Bi jedem Poste hets ei Geuppe geh, wo gwunne het. Schlussendlich simmer ganz une bim Parkplatz Laui gsi.
Alli Gruppe hend sich im Wäldli es HQ gsuecht und igrichtet. Denn hemer 15 Minute Ziit gha zum e supercooli Erfindig z mache. De Gwünner isch de Streamy gsi, en Metallfisch wo Flüss süberet. Nachher hemer Salat und Wurst zum Zmittag gha. Nach em Mittag isch eus s GS erchlärt worde. Es het Chlüpperlikampf und Chartekampf geh. Mit em verdiente Geld het mer chöne Felder laufe, Ressource chaufe, Bastelmaterial chaufe und Hiwiis und Edelstei chaufe. Nebedra het jedi Gruppe müse es Fernrohr bastle und es het no Specials und Glücksrad geh zum Geld verdiene. D Sirüpler isch de Gwünner vom GS gsi. Denn hets e Znachtverstigerig geh und es paar hend es Füür vorbereitet. Nach em Znacht hemer ufgrumt und denn simer all zum Zeltplatz gloffe. Det hemer es Schere-Stei-Papier und no anderi Spiel gspillt. Es het villi Gruppewechsel geh und am Schluss sind nur no die understi Tschublade, Drunken Sailors und Gringos übrig gsi. Denn sind d Butze ufegloffe und is Bett. D Leiter hend no es Ei über die Schnur und Auberginefuessball gmacht. Nachhher sind’s nur no zwei Gruppe gsi; Gringos und Drunken Sailors. Am morge sind d Leiter früeh ufgstande zum es Floss baue, es het di ganz ziit mega gregnet. Us de Hiwiis hemer erfahre, dass mer de Gräppelersee hend müse überquere. D Butze sind au no zum Zeltplatz cho und denn isch de gross Showdown cho. Zerst hend 5 Butze us de Gruppe müsse es Isschollespiel mache demit d Floss mit eim Leiter druf hend chöne losfahre. Damit d floss no schneller sind, sind no paar Leiter vo de zwei gruppe mit gschwumme und hend d floss gstosse. Mit es bitz Sabotage hend d Drunken Sailors knapp gwunne. Nachher simmer all im schiff ufegloffe und hend Älplermagrone gesse.


